DIE Wes-Kaapse kabinet het sy steun aan die loodskomitee vir die beoogde nywerheidsontwikkelingsone (NOS) in Saldanhabaai verleen om by die nasionale departement van handel en nywerheid aansoek te doen om ’n bedryfspermit.
Verteenwoordigers van die departement, die provinsiale departement van ekonomiese ontwikkeling en toerisme, die provinsiale tesourie, die provinsiale departement van omgewingsake en ontwikkelingsbeplanning, Wesgro en die Saldanhabaai-munisipaliteit dien in die loodskomitee.
Daar sal nou voortgegaan word om die Saldanhabaai-NOS-lisensiëringsmaatskappy te stig waarkragtens om die NOS-permit aansoek gedoen sal word. Die lewensvatbaarheidstudie vir die NOS het op drie bedryfsgebiede met groot potensiaal gefokus, naamlik hernieubare energie, olie- en gas asook staal en minerale. Die studie het bevind so ’n NOS sal ná 25 jaar ’n minimum opbrengs van R11,2 miljard vir Saldanhabaai genereer en sowat 12 000 volhoubare werkgeleenthede skep. (Bron: Die Burger.)